مجاز من مانے معنی کا نام نہیں۔ اگر ہر لفظ کو کسی بھی بے تعلق معنی میں لیا جا سکے تو گفتگو سے اعتماد اٹھ جائے گا۔ اسی لیے اصل معنی اور مجازی معنی کے درمیان قابلِ فہم مناسبت ہونی چاہیے۔
«لا بد لاستعمال اللفظ في غير ما وضع له من مناسبة»
لفظ کو اس کے اصل موضوع لہٗ سے ہٹا کر استعمال کرنے کے لیے مناسبت ضروری ہے۔
«كالأسد للرجل الشجاع»
جیسے بہادر آدمی کے لیے شیر کا لفظ استعمال کرنا۔
اسد اصل میں شیر کے لیے ہے، مگر بہادر آدمی کو اسد اس وجہ سے کہا جا سکتا ہے کہ دونوں میں شجاعت کا وصف ملتا ہے۔ یہ مناسبت مشابہت کی ہے۔ اس کے برعکس کسی بے تعلق چیز کے لیے اسے بلا قرینہ استعمال کرنا معتبر مجاز نہیں بنتا۔